MFUMO MPYA WA USAJILI WA VIZAZI WA WATOTO

Meneja Masoko na Mawasiliano kutoka Wakala wa Usajili Ufilisi na Udhamini (RITA) Josephat Kimaro KUSHOTO akieleza kwa waandishi wa habari juu ya mafanikio ya utekelezaji wa mfumo mpya wa usajili wa vizazi kupitia mkakati wa usajili wa watoto walio na umri chini ya miaka mitano, katika mkutano na waandishi wa habari uliofanyika leo Jijini Dar es salaam kulia ni Mkurugenzi Msaidizi Idara ya Habari Zamaradi Kawawa.

Mfumo mpya wa Usajili ulizinduliwa Tarehe 23 Julai 2013 mkoani Mbeya na Naibu Waziri wa Katiba na Sheria Mh. Angellah Kairuki. Lengo kuu la mabadiliko ya mfumo wa Usajili ni kuondoa changamoto zilizokuwa zinasababisha wananchi wengi kotosajiliwa na kupata vyeti vya Kuzaliwa Nchini. Kwa mujibu wa Takwimu ni asilimia 23 tu ya Watanzania wamesajiliwa na kupata vyeti vya kuzaliwa. Changamoto ambazo zimekuwa zikisababisha wananchi wengi kutosajiliwa ni....M.M

pamoja na umbali mrefu kutoka maeneo wanayoishi mpaka katika Ofisi za Wasajili wa Wilaya, ada ya cheti, taratibu za usajili zisizo rafiki, elimu ndogo ya wananchi kuhusu umuhimu wa cheti cha kuzaliwa, na nyinginezo.

Kwa Kuanzia, utekelezaji wa mfumo mpya wa Usajili wa Vizazi umeanza kwa Kundi la Watoto walio na Umri chini ya Miaka Mitano( Underfive Birth Registration Initiative – U5BRI) katika Mkoa wa Mbeya.

Katika Mfumo mpya maboresho yaliyofanyika ni pamoja na kushusha huduma za Usajili na kutoa vyeti katika ngazi ya kata ambapo utafanyika katika Ofisi za Watendaji kata na katika vituo vya Tiba vinavyotoa huduma ya Afya ya Mama na Mtoto. Pia katika mfumo mpya Serekali imeondoa ada ya Cheti kwa Watoto wa chini ya Miaka Mitano. Vilevile taratibu za usajili zimeboreshwa kwani mzazi wa mtoto akifika katika vituo vya usajili ataweza kumsajili na kupata cheti cha kuzaliwa hapohapo tofauti na awali ambapo usajili ulifanyika hospitali mtoto anapozaliwa na baadae mzazi kutakiwa kwenda katika ofisi za RITA ili kupata cheti cha Mtoto. Pia watendaji kata wanatumika katika kutoa elimu ya umuhimu wa usajili na kuwa na Vyeti vya kuzaliwa

Pia kumekuwa na changamoto ya kupatikana taarifa za waliosajiliwa kwani katika mfumo wa awali wasajili wa wilaya wamekuwa hawaziwakilishi kwa wakati hivyo Serikali kukosa taarifa za Vizazi kwa ajili ya matumizi ya Mipango ya Maendeleo. Katika utekelezaji unaoendelea Mkoani Mbeya utumaji taarifa kutumia teknolojia unaenda kufanyika kwa kutumia simu za Kiganjani.

Katika utekelezaji unaoendelea mkoani Mbeya, mwamko wa Wananchi umekuwa mkubwa sana kwa zaidi ya watoto 61,000 walio na umri wa chini ya Miaka Mitano wameweza kusajiliwa na kupatiwa vyeti kwa muda wa siku 14 za awali za utekelezaji na kati ya hao asilimia 49 wakiwa wanawake na wanaume asilimia 51. Wilaya zinazoongoza kwa usajili ni Mbozi, Rungwe na Mbarali na Wilaya ya Momba ni ya Mwisho mpaka sasa kwa Mujibu wa Takwimu. Pia watoto wengi zaidi wamesajiliwa katika Ofisi za Watendaji Kata kuliko katika Vituo vya Tiba. Lengo la RITA ni kusajili watoto 230,000 Mkoani Mbeya kufikia mwezi Juni 2014.

Zoezi la Usajili na kutoa vyeti katika Ofisi za Kata na Vituo vya Tiba kwa watoto wa Umri chini ya Miaka Mitano ni la Kudumu.

Awamu ya kwanza ya utekelezaji wa Mkakati huu inajumuisha Mikoa ya Mbeya, Mwanza, Shinyanga, Simiyu na Geita ambayo inategemea kukamiliaka Julai 2015.

Josephat Kimaro

Meneja Masoko na Mawasiliano – RITA

12 AGOSTI 2013